Rugadh Nioclás Tóibín sa bhliain 1928 i mBaile Uí Raghallaigh, Heilbhic i nGaeltacht na nDéise, an mac ab óige d’ochtar clainne a raibh ceol ag an uile dhuine acu. Bhí ana-thionchar ag a uncail Nioclás Mór, údar Duanaire Déiseach (1978) ar an amhránaí óg agus is mó amhrán a fuair sé uaidh. Bhain sé Corn Chomhlacht an Oideachais (Corn Uí Riada mar a thugadh ar ball air) trí huaire as a chéile i 1961, ’62 agus ’63, rud nár deineadh riamh roimhe san ná ó shoin. Tá dhá eisiúchán dá chuid amhránaíochta le ceannach anois ar dhlúthdhiosca, mar a bhfuil Nioclás Tóibín, Gael Linn, 2007 agus Rinn na nGael, Cló Iar-Chonnachta, 1999 agus táimid thar a bheith buíoch den dá chomhlacht sin as rianta ós na saothair sin a chur ar fáilt dúinn agus an suíomh seo á chóiriú. Chraoladh clár teilifíse ag an gcomhlacht teilifíse Nemeton teo. sa bhliain 2006, dar teideal Orpheus na nDéise, a thug ana-léargas dúinn ar laoch mór so na hamhránaíochta.
